Teks Khutbah Jumat Singkat Bahasa Jawa : QURBAN NGUTAMAAKEN PERINTAH ALLAH TINIMBANG NDONYA

 

 

Teks Khutbah Jumat Singkat

Qurban Ngutamaaken Perintah Allah

Tinimbang Ndonya

Ustadz Wismanto,S.Pd.I

 

الْحَمْدُ لِلَّهِ الَّذِي هَدَانَا لِهَذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ , أَشْهَدُ أَنْ لاَ إِلَهَ إِلاَّاللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ, اَللَّهُمّ صَلِّ وَسَلِّمْ عَلى مُحَمّدٍ وَعَلى آلِهِ وأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن

أَمَّا بَعْدُ، فَيَا عِبَادَ اللهِ، أُوْصِيْكُمْ وَنَفْسِي بِتَقْوَى اللهِ، فَقَدْ فَازَ المُتَّقُوْنَ. قَالَ اللهُ تَعَالَى فِي الْقُرْآنِ الْكَرِيْمِ: يَا أَيُّهَا الَّذِيْنَ آمَنُوا اتَّقُوا اللهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

Jamaah jumah rahimakumullah

Puji syukur mugi tansah kunjuk dhumateng Allah Ta’ala ingkang tansah paring rahmat lan taufiq dhumateng kula lan panjenengan satemah ing siang punika kula lan panjenengan saget pinanggih wonten majelis ingkang minulya kanthi kebak kawilujengan. Shalawat ugi salam mugi tansah katetepaken dhumateng nabi Muhammad SAW ingkang tansah kula lan panjenengan tengga syafaatipun wonten ing dinten akhir. Wonten ing kalodhangan khutbah siang punika, khatib wasiat sumangga tansah ningkataken taqwa dhumateng Allah kanthi nindakaken dhawuhipun lan nebihi awisanipun mugi kanthi taqwa Allah tansah paring kamulyan panggesangan ing dunya ngantos dumugi akhirat.

Jamaah jumah rahimakumullah

Mboten dangu malih, kula lan panjenengan badhe mapag dinten riyaya Idul Adha utawi dinten riyaya Qurban. Saben-saben dinten menika rawuh, kula lan panjenengan tansah dipun-engetaken dhumateng lelampahan suci setunggal kulawarga ingkang pinuji, inggih menika kulawarganipun Nabi Ibrahim AS.

Wonten ing kalodhangan menika, khatib badhe ngaturaken perkawis pokok saking lampah panggesangan keluarganipun nabi Ibrahim AS. Kanthi pangajab sasampunipun kula lan panjenegan nyinaoni sejarah ingkang luhur menika sageta mendet piwucal kagem panggesangan saben dintenipun.

Sepisan: Qurban minangka Bukti Katresnan dhumateng Allah.

 Ibadah qurban menika sejatosipun minangka "Ujian Katresnan" saking Allah SWT dhumateng hamba-Ipun. Kita dipun-uji ngenani pundi ingkang langkung dipun-tresnani: Perintah Allah utawi bondho donya lan kesenengan pribadi? Tuladha luhur sampun dipun-paringaken dening Nabi Ibrahim AS nalika dipun-utus nyembeleh putranipun, Nabi Ismail AS. Katresnan dhumateng putra sarta donya mboten ngalahaken ketaatanipun dhumateng Allah, kados dene ingkang dipun-abadikeun wonten ing Al-Qur'an, Surat As-Saffat ayat 102:

فَلَمَّا بَلَغَ مَعَهُ السَّعْيَ قَالَ يَا بُنَيَّ إِنِّي أَرَىٰ فِي الْمَنَامِ أَنِّي أَذْبَحُكَ فَانْظُرْ مَاذَا تَرَىٰ ۚ قَالَ يَا أَبَتِ افْعَلْ مَا تُؤْمَرُ ۖ سَتَجِدُنِي إِنْ شَاءَ اللَّهُ مِنَ الصَّابِرِينَ

Tegesipun: "Mula nalika bocah iku wis tekan umur (sing bisa) nyambut gawe bareng karo Ibrahim, Ibrahim kandha: 'He anakku, sejatine aku weruh ing sajroning impen yen aku nyembeleh sira. Mula pikiren, kepiye panemumu!' Ismail mangsuli: 'Dhuh bapak kawula, tindakaken menopo ingkang dipun-perintahaken dhumateng panjenengan; insya Allah panjenengan badhe manggihaken kawula kalebet tiyang-tiyang ingkang sabar'."

Ayah dhumateng putra, utawi tiyang sepuh dhumateng anak, menika nggadhahi ikatan katresnan ingkang bakuh sanget. Nanging lumantar ayat menika, Nabi Ibrahim AS paring piwucal bilih katresnan dhumateng makhluk mboten pareng nglangkungi katresnan dhumateng Gusti Allah SWT. Nalika dhawuhipun Gusti Allah sampun tumurun, sedaya kasenengan, pepenginaning manah, sarta perkawis donya kedah dipun-singkiraken dhisik demi nggayuh ridha-Nipun. Menika bukti bilih iman ingkang sejati menika mbetahaken pangurbanan ingkang ageng, lan mboten wonten perkawis donya ingkang pantes dipun-dadosaken alesan kangge nilaraken dhawuhing Pangeran.

Kaping Kalih: Ngresiki Manah saking Katresnan Donya

Wonten ing jaman samenika, kula lan panjenengan dipun-utus supados nyembeleh "sifat kewan" sarta sipat bakhil (pelit) ingkang rumaket wonten ing dhiri. Asring kula lan panjenengan rumaos awrat ngedalaken arto kangge qurban amargi taksih ngetung-etung untung-rugi mawi petungan donya. Kamangka, Rasulullah SAW sampun paring pepeling ingkang atos dhumateng tiyang ingkang gadhah kelonggohan bondho nanging mboten purun berqurban:

مَنْ كَانَ لَهُ سَعَةٌ، وَلَمْ يُضَحِّ، فَلَا يَقْرَبَنَّ مُصَلَّانَا

Tegesipun: "Sopo wonge sing duwe kelonggaran (rejeki) nanging dheweke ora gelem qurban, mula aja pisan-pisan nyedaki panggonan shalat kita (masjid kita)."

Gusti Allah mboten mbetahaken daging utawi gethihipun kewan qurban, nanging ingkang dumugi dhumateng Allah inggih menika raos taqwa lan keikhlasan kula lan panjenengan sedaya (QS. Al-Hajj: 37).

Sifat kewan ingkang wonten ing dhiri manungsa, kados dene sipat gragas, egois, srakah, lan nggadhahi raos bakhil utawi medhit, menika ingkang saged ngrisak tatanan iman sarta sosial. Kanthi nindakaken ibadah qurban, kula lan panjenengan dipun latih supados saged ngasoraken sarta "nyembeleh" sipat-sifat ingkang mboten sae kala wau. Bondho donya ingkang kita padosi rina lan wengi punika sejatosipun namung titipan, lan badhe dados dosa menawi namung dipun-pendhem piyambak mboten dipun-bagekaken dhumateng sesami ingkang mbetahaken. Lumantar qurban, manah kita dipun-resiki saking penyakit wahn (gila donya lan wedi mati), saengga kita saged dados pribadi ingkang loma, nggadhahi raos empati, sarta rumaos ayem amargi saged paring kabingahan dhumateng tiyang sanes.

Pungkasaning atur, sumangga momentum Idul Adha ingkang badhe rawuh punika kula lan panjenengan dadosaken sarana kangge nggugah malih raos ikhlas lan takwa wonten ing salebeting manah. Ampun ngantos ketungkul nresnani dunya ingkang sawetara punika, saengga kula lan panjenengan pelit lan ngetung-etung untung-rugi nalika dipun-timbali nindakaken dhawuhipun Gusti Allah. Sumangga kula lan panjenengan donga sesarengan, mugi-mugi Gusti Allah tansah paring jembaring rejeki, kekiyatan iman, sarta kasagetan dhumateng kula lan panjenengan sedaya supados saged nindakaken ibadah qurban taun punika kanthi loma lan tulus, saengga qurban kula lan panjenengan saged dados seksi ingkang nylametaken kula lan panjenengan wonten ing dinten kiyamat mangke.

بَارَكَ اللهُ لِي وَلَكُمْ فِي الْقُرْآنِ الْعَظِيْمِ، وَنَفَعَنِي وَإِيَّاكُمْ بِمَا فِيْهِ مِنَ الْآيَاتِ وَالذِّكْرِ الْحَكِيْمِ. أَقُوْلُ قَوْلِي هَذَا وَأَسْتَغْفِرُ اللهَ لِي وَلَكُمْ، فَاسْتَغْفِرُوْهُ، إِنَّهُ هُوَ الْغَفُوْرُ الرَّحِيْمُ.

 

 Khutbah 2

اَلْحَمْدُ لِلّٰهِ حَمْدًا كَثِيْرًا كَمَا أَمَرَ. أَشْهَدُ أَنْ لَا إِلهَ إِلَّا اللهُ وَأَشْهَدُ أَنَّ مُحَمَّدًا عَبْدُهُ وَرَسُوْلُهُ اللَّهُمَّ صَلِّ وَسَلِّمْ وَبَارِكْ عَلَى رَسُوْلِ اللَّهِ وَعَلَى اَلِهِ وَأَصْحَابِهِ وَمَنْ وَلآَهُ أَمَّا بَعْدُ فَيَا عِبَادَ اللَّهِ أُصِيْكُمْ وَنَفْسِيْ بِتَقْوَ اللَّهِ لَعَلَّكُمْ تُرْحَمُوْنَ وَقَالَ تَعَالَى يَا اَيُّهَا الَّذِيْنَ آمَنُوْا اتَّقُوْا اللّٰهَ حَقَّ تُقَاتِهِ وَلاَ تَمُوْتُنَّ إِلاَّ وَأَنْتُمْ مُسْلِمُوْنَ

إِنَّ اللهَ وَمَلاَئِكَتَهُ يُصَلُّوْنَ عَلَى النَّبِيِّ، يَاأَيُّهاَ الَّذِيْنَ ءَامَنُوْا صَلُّوْا عَلَيْهِ وَسَلِّمُوْا تَسْلِيْمًا. اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ

رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا

رَبَّنَآ اٰتِنَا فِى الدُّنْيَا حَسَنَةً وَّفِى الْاٰخِرَةِ حَسَنَةً وَّقِنَا عَذَابَ النَّارِ

Untuk membaca atau mencetak file khutbah jumat   singkat berbahasa Jawa ini dalam bentuk PDF silahkan download melalui tautan berikut ini :

DOWNLOAD PDF