Teks Khutbah Jumat Singkat Bahasa Jawa : PIWUCAL SAKING PANASIPUN KONFLIK TIMUR TENGAH

 

 

Teks Khutbah Jumat Singkat

Piwucal Saking Panasipun

Konflik Timur Tengah

Ustadz Wismanto,S.Pd.I

 

الْحَمْدُ لِلَّهِ الَّذِي هَدَانَا لِهَذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ , أَشْهَدُ أَنْ لاَ إِلَهَ إِلاَّاللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ, اَللَّهُمّ صَلِّ وَسَلِّمْ عَلى مُحَمّدٍ وَعَلى آلِهِ وأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن

أَمَّا بَعْدُ، فَيَا عِبَادَ اللهِ، أُوْصِيْكُمْ وَنَفْسِي بِتَقْوَى اللهِ، فَقَدْ فَازَ المُتَّقُوْنَ. قَالَ اللهُ تَعَالَى فِي الْقُرْآنِ الْكَرِيْمِ: يَا أَيُّهَا الَّذِيْنَ آمَنُوا اتَّقُوا اللهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

 

Jamaah jumah rahimakumullah

Puji syukur mugi tansah kunjuk dhumateng Allah Ta’ala ingkang tansah paring rahmat lan taufiq dhumateng kula lan panjenengan satemah ing siang punika kula lan panjenengan saget pinanggih wonten majelis ingkang minulya kanthi kebak kawilujengan. Shalawat ugi salam mugi tansah katetepaken dhumateng nabi Muhammad SAW ingkang tansah kula lan panjenengan tengga syafaatipun wonten ing dinten akhir.

Jamaah jumah rahimakumullah

Wonten kesempatan khutbah siang punika khatib wasiat sumangga tansah ningkataken taqwa dhumateng Allah kanthi nindakaken dhawuhipun lan nebihi awisanipun. Mugi kanti taqwa Allah tansah paring kamulyan panggesangan wonten ing dunya dumugi akhirat. Aamiin.

 Jamaah jumah rahimakumullah

Sakpunika, mripat donya nembe tumuju dhumateng benteripun politik lan perang ing Timur Tengah, mliginipun memala antawisipun Iran, Israel, lan Amerika. Kahanan ingkang mboten menentu punika kedah kula lan panjenengan dadekaken piwucal (ibrah) ingkang lebet, supados iman kula lan panjenengan mboten goyah nanging malah tansah kiyat.

Sepisan, kula lan panjenengan kedah sadar bilih donya punika kebak pacoban lan mboten wonten ingkang langgeng. Peperangan punika nuduhaken bilih kakuwatan manungsa lan teknologi gegaman ingkang canggih mboten saged nandingi kersanipun Gusti Allah. Gusti Allah sampun dhawuh ing Al-Qur'an Surah Al-Baqarah ayat 155:

وَلَنَبْلُوَنَّكُمْ بِشَيْءٍ مِنَ الْخَوْفِ وَالْجُوعِ وَنَقْصٍ مِنَ الْأَمْوَالِ وَالْأَنْفُسِ وَالثَّمَرَاتِ ۗ وَبَشِّرِ الصَّابِرِينَ

"Lan sayekti Ingsun bakal nyoba marang sira kabeh kanthi sethithik rasa wedi, keluwen, kurang bandha, jiwa, lan woh-wohan. Lan kabarana bebungah wong-wong kang padha sabar."  (Surah Al-Baqarah ayat 155).

Saking ayat punika, kula lan panjenengan dipun emutaken bilih rasa ajrih lan kekirangan punika sunnatullah. Ingkang paling wigati sanes sepinten agengipun pacoban punika, nanging sepinten kiyatipun kesabaran lan tawakal kula lan panjenengan ngadhepi kahanan donya ingkang tansah gingsir.

Kaping kalih, ing tengahing memala perang punika, kula lan panjenengan minangka umat Islam kedah njagi lathi lan emosi. Ing jaman medsos kados sakpunika, kathah pawarta (berita) ingkang mboten jelas sumberipun (hoax) ingkang saged damel perpecahan. Ampun ngantos kula lan panjenengan gampil kasinggul lan malah tukar padu kaliyan sederek piyambak amargi benten pemanggih babagan politik internasional. Rasulullah SAW paring pepeling:

المُسْلِمُ مَنْ سَلِمَ المُسْلِمُونَ مِنْ لِسَانِهِ وَيَدِهِ

"Wong Muslim iku yaiku wong kang wong Muslim liyane ngrasa slamet saka gangguan lathi lan tangane." (HR. Bukhari).

Njagi lathi lan jempol kula lan panjenengan saking komentar ingkang saged ngrusak ukhuwah punika ugi kalebet bageyan saking jihad njagi katentreman.

Kaping tiga, kakuwatan ingkang paling ageng kagem tiyang mukmin ing kahanan pancabaya (bahaya) punika inggih Donga. Donga punika as-silahul mukmin, senjatanipun tiyang mukmin. Nalika tangan kula lan panjenengan mboten saged nggayuh papan peperangan, nalika raga kula lan panjenengan kacek jarak ingkang tebih, donga saged nembus langit lan nggayuh Arasyipun Allah tanpa alangan.

Donga punika wujud saking raos kamanungsan lan akidah. Kula lan panjenengan kedah nyuwun dhumateng Allah supados para sederek muslim, mliginipun warga sipil, bocah-bocah, lan para sepuh ing Timur Tengah tansah dipun paringi pangayoman. Donga kula lan panjenengan dhumateng sedulur Muslim saking kadohan punika donga ingkang mustajab. Kados hadits Nabi, bilih donga kagem sedulur tanpa kaweruhan tiyangipun bakal dipun amini dening malaikat. Mula, ampun nate remehaken kakuwatan donga ing sujud-sujud kula lan panjenengan, amargi Allah Maha Kuwaos mbalikke kahanan ingkang mboten mungkin dados mungkin.

Jamaah jumah rahimakumullah

Minangka panutup, mangga kula lan panjenengan tansah nyenyuwun dhumateng Gusti Allah, mugi-mugi benteripun konflik ing Timur Tengah punika mboten ngrisak tatanan kamanungsan lan mboten nular dados perpecahan ing negari kita piyambak. Mugi Allah paring kekiyatan dhumateng para sederek Muslim ing pundi kemawon, sarta paring hidayah dhumateng para pemimpin donya supados langkung nengenaken katentreman tinimbang peperangan. Amargi mboten wonten kakuwatan ingkang saged ngasoraken kersanipun Allah, lan namung dhumateng Panjenenganipun kula lan panjenengan pasrah sumarah.

 أَقُوْلُ قَوْلِي هَذَا وَاسْتَغْفِرُ اللهَ لِي وَلَكُمْ وَلِسَائِرِ المُسْلِمِيْنَ إِنَّهُ هُوَ السَمِيْعُ العَلِيْمُ

Khutbah Kaping Kalih

 

الحَمْدُ للهِ رَبِّ العَالمِيْنَ وَالصَّلاَةُ وَالسَّلاَمُ عَلَى أَشْرَافِ الأَنْبِيَاءِ وَالمرْسَلِيْنَ نَبِيِّنَا مُحَمَّدٍ وَعَلَى آلِهِ وَصَحْبِهِ

وَأَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ، يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

اَللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ وَعَلَى آلِهِ وَأَصْحَابِهِ وَقَرَابَتِهِ وَأَزْوَاجِهِ وَذُرِّيَّاتِهِ أَجْمَعِيْنَ

اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ

اللَّهُمَّ أَنْتَ اللَّهُ لَا إِلَهَ إِلَّا أَنْتَ. أَنْتَ الْغَنِيُّ وَنَحْنُ الْفُقَرَاءُ

اللَّهُمَّ إِنَّا نَسْأَلُكَ الهُدَى وَالتُّقَى وَالعَفَافَ وَالغِنَى

رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا

رَبَّنَآ اٰتِنَا فِى الدُّنْيَا حَسَنَةً وَّفِى الْاٰخِرَةِ حَسَنَةً وَّقِنَا عَذَابَ النَّارِ

Untuk membaca atau mencetak file khutbah jumat singkat berbahasa Jawa ini dalam bentuk PDF silahkan download melalui tautan berikut ini.

Download