Teks Khutbah Jumat Singkat Bahasa Jawa : GESANG INGKANG NGREMENAKEN

 

Teks Khutbah Jumat Singkat

Gesang Ingkang Ngremenaken

Ustadz Wismanto,S.Pd.I

 

الْحَمْدُ لِلَّهِ الَّذِي هَدَانَا لِهَذَا وَمَا كُنَّا لِنَهْتَدِيَ لَوْلَا أَنْ هَدَانَا اللَّهُ

أَشْهَدُ أَنْ لاَ إِلَهَ إِلاَّاللهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّداً عَبْدُهُ وَرَسُوْلُهُ

اَللَّهُمّ صَلِّ وَسَلِّمْ عَلى مُحَمّدٍ وَعَلى آلِهِ وأَصْحَابِهِ وَمَنْ تَبِعَهُمْ بِإِحْسَانٍ إِلَى يَوْمِ الدّيْن

عِبَادَ اللهِ أُوْصِيْكُمْ وَإِيَّايَ بِتَقْوَى اللهِ فَقَدْ فَازَ الْمُتَّقُوْنَ قَالَ اللهُ تَعَالَى

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

 

Jamaah jumah rahimakumullah

Puji syukur tansah kunjuk dhumateng Allah Ta’ala ingkang tansah paring rahmat lan taufiq dhumateng kula lan panjenengan satemah ing siang punika kula lan panjenengan saget pinanggih wonten majelis ingkang minulya kanthi kebak kawilujengan. Shalawat ugi salam mugi tansah katetepaken dhumateng nabi Muhammad ﷺ ingkang tansah kita tengga syafaatipun wonten ing dinten akhir.

Jamaah jumah rahimakumullah

Wonten kesempatan khutbah siang punika khatib wasiat sumangga tansah ningkataken taqwa dhumateng Allah kanthi nindakaken dhawuhipun lan nebihi awisanipun. Mugi kanti taqwa Allah tansah paring kamulyan panggesangan wonten ing dunya dumugi akhirat. Aamiin.

Jamaah jumah rahimakumullah

Wekdal sakpunika kula lan panjenengan asring sanget mireng utawi manggihi tiyang- tiyang ingkang  ngeluh, sambat sebut bilih gesangipun rekaos. Wonten ing pasrawungan, wonten ing tempat umum lan wonten ing media sosial isinipun sambat sebut lan keluh kesah sanak sederek kula lan panjenengan. Ingmangka sejatosipun gesang punika gumantung kadospundi anggen kula lan panjenengan ngraosaken. Menawi dipun raosaken kanthi susah, awrat, rekaos nggih gesang punika estu awrat lan rekaos. Ananging menawi anggen kula lan panjenengan ngraosaken gampil, sekeca lan ngremenaken mila gesang punika nggih estu ngemenaken . Setunggal wekdal Rasulullah ngendika, bilih Allah Subhanahu Wata’ala  ngendika wonten ing hadits hudsi:

أَنَا عِنْدَ ظَنِّ عَبْدِى بِى

“Ingsung iku gumantung panyakra bawane kawulaningsung marang ingsung”  (Muttafaqun ‘alaih).

Hadits punika suka dhawuh wigatosipun husnudzan dhumateng Allah Subhanahu Wata’ala. Menawi kula lan panjenengan pitados bilih Allah badhe paring panggesangan ingkang ngremenaken mila estu Panjeneganipun Allah badhe paring panggesangan ingkang sae dhumateng kula lan panjenengan.

Jamaah jumah rahimakumullah

Allah Subhanahu Wata’ala  sampun janji badhe paring panggesangan ingkang ngremenaken dhumateng kula lan panjenengan, ngendika Allah :

مَنْ عَمِلَ صَالِحًا مِنْ ذَكَرٍ أَوْ أُنْثَى وَهُوَ مُؤْمِنٌ فَلَنُحْيِيَنَّهُ حَيَاةً طَيِّبَةً وَلَنَجْزِيَنَّهُمْ أَجْرَهُمْ بِأَحْسَنِ مَا كَانُوا يَعْمَلُونَ

“Sing sapa nindhake laku becik padha uga pria utawa Wanita lan deweke iku iman, mesti Ingsun bakal maringi panguripan kan kepenak ana ing donya, sarta ingsun bakal nyampurnaake ganjarane kalawan kang luwih becik tinimbang karo barang kang wus tau ditindhakake”. (QS. An- Nahl: 97).

Miterat Ibnu Katsir wonten ing tafsiripun bilih ingkang dipun maksud amal shalih punika sedaya tindhak lampah ingkang miderek tata aturanipun Allah wonten ing al- quran lan miderek tuntunan nabinipun wonten ing as- sunnah.

Jamaah jumah rahimakumullah

Mendet piwucal saking ayat 97 surat an- nahl wonten ing nginggil bilih estu Allah Subhanahu Wata’ala  janji badhe maringi panggesangan ingkang sekeca lan ngremenaken dhumateng kula lan panjenengan kanthi kali syarat:

Syarat ingkang sepisan: Yakin dhumateng takdiripun Allah

Kula lan panjenengan saget pinaringan panggesangan ingkang ngremenaken menawi yakin dhumateng Allah. Maksudipun kula lan panjenengan kedhah yakin bilih punapa kemawon ingkang Allah takdiraken punika sae lan cocok dhumateng kula lan panjenengan. Allah Subhanahu Wata’ala  punika sampun milihaken nasib ingkang palin sae dhumateng kula lan panjenengan. Pilihanipun Allah ing bab pakaryan, keluarga, lan punapa kemawon punika sampun paling pas lan paling sae. Menawi kula lan panjenengan saget nampi perkawis punika kanthi lila legawa mila estu raosipun ayem lan ngremenaken.

Syarat kaping kalih: kedhah miderek al- quran ugi as- sunnah.

Syarat saklajengipun kagem nggayuh panggesangan ingkang sekeca lan ngremenaken punika kanthi miderek tuntunan al- quran ugi tuntunan as- sunnah. Sauger kula lan panjenengan boten nalingsir saking pedoman al- quran ugi as- sunnah mila dipun jamin gesang punika sekeca lan ngremenaken. Ngendika Allah Subhanahu Wata’ala  :

وَمَن يُطِعِ ٱللَّهَ وَرَسُولَهُۥ فَقَدْ فَازَ فَوْزًا عَظِيمًا

“Lan sapa kang nderek marang temen deweke oleh kabegjan kang agung” (QS. Al- Ahzab:71).

Jamaah jumah rahimakumullah

Akhiripun sumangga kula lan panjenengan tansah njagi kapitadosan dhumateng Allah lan miderek punapa kemawon dhawuh al- quran ugi as- sunnah, mugi kanthi punika Allah tansah paring panggesangan ingkang  minulya wonten ing donya lan akhirat.

أَقُوْلُ قَوْلِي هَذَا وَاسْتَغْفِرُ اللهَ لِي وَلَكُمْ وَلِسَائِرِ المُسْلِمِيْنَ إِنَّهُ هُوَ السَمِيْعُ العَلِيْمُ

 

Khutbah Kaping Kalih

 

الحَمْدُ للهِ رَبِّ العَالمِيْنَ وَالصَّلاَةُ وَالسَّلاَمُ عَلَى أَشْرَافِ الأَنْبِيَاءِ وَالمرْسَلِيْنَ نَبِيِّنَا مُحَمَّدٍ وَعَلَى آلِهِ وَصَحْبِهِ

وَأَشْهَدُ أَنْ لاَ إِلَهَ إِلاَّ اللَّهُ وَحْدَهُ لاَ شَرِيْكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ

يَا أَيُّهَا الَّذِينَ آمَنُوا اتَّقُوا اللَّهَ حَقَّ تُقَاتِهِ وَلَا تَمُوتُنَّ إِلَّا وَأَنْتُمْ مُسْلِمُونَ

إِنَّ اللهَ وَمَلَائِكَتَهُ يُصَلُّونَ عَلَى النَّبِيِّ، يَا أَيُّهَا الَّذِينَ آمَنُوا صَلُّوا عَلَيْهِ وَسَلِّمُوا تَسْلِيمًا

اَللَّهُمَّ صَلِّ وَسَلِّمْ وَبَارِكْ عَلَى مُحَمَّدٍ وَعَلَى آلِهِ وَأَصْحَابِهِ وَقَرَابَتِهِ وَأَزْوَاجِهِ وَذُرِّيَّاتِهِ أَجْمَعِيْنَ

اَللَّهُمَّ اغْفِرْ لِلْمُسْلِمِيْنَ وَالْمُسْلِمَاتِ وَالْمُؤْمِنِيْنَ وَالْمُؤْمِنَاتِ اْلأَحْيَاءِ مِنْهُمْ وَاْلأَمْوَاتِ، إِنَّكَ قَرِيْبٌ مُجِيْبُ الدَّعَوَاتِ وَيَا قَاضِيَ الْحَاجَاتِ

اللَّهُمَّ أَنْتَ اللَّهُ لَا إِلَهَ إِلَّا أَنْتَ. أَنْتَ الْغَنِيُّ وَنَحْنُ الْفُقَرَاءُ

اللَّهُمَّ إِنَّا نَسْأَلُكَ الهُدَى وَالتُّقَى وَالعَفَافَ وَالغِنَى

رَبَّنَا هَبْ لَنَا مِنْ أَزْوَاجِنَا وَذُرِّيَّاتِنَا قُرَّةَ أَعْيُنٍ وَاجْعَلْنَا لِلْمُتَّقِينَ إِمَامًا

رَبَّنَا آتِنَا فِي الدُّنْيَا حَسَنَةً وَفِي الْآخِرَةِ حَسَنَةً وَقِنَا عَذَابَ النَّارِ

 

Untuk membaca atau mencetak file khutbah jumat   singkat berbahasa Jawa ini dalam bentuk PDF silahkan download melalui tautan berikut ini 

DOWNLOAD